قصة قصيرة للدكتور هشام السحار
(10)
سعيد: هاه .. عملت بلاغ فى القسم
مسعد: لأ..قالوا لى لازم يفوت 24 ساعة عشان يعملوا البلاغ..
شربات : ياخويا ماحنا بقالنا ييجى 10 ساعات ..ومابنش له أثر
مسعد: النظام كدة ..لازم نستنى للصبح ..ولو ماظهرش.. نبقى نعمل بلاغ
سعيد: طيب ما قولتش ليه على موضوع اللى خاطفينه
مسعد: خفت يا سعيد:..ماهو مكتوب فى الرسالة لو بلغنا البوليس ..حايتاووه ومش حانعرف له طريق جره
شربات: يقطعك يا لسانى..أنا السبب فى دا كله
سعيد: عشان تبطلوا رغى بقى
مسعد: وهو دا وقته.. المهم تعالوا نفكر ..مين ممكن يكون اللى خاطفه
سعيد: مين والا مين ؟؟.. دا أحنا حوالينا العوق كله
شربات: استنوا كدة .. انا سامعه صوت رجلين على السلم .. يارب يكون خير
(طرقات على االباب .. صوت الباب يفتح )
شربات ( تزغرد ): حمد الله على السلامة يا سيد الرجالة
مسعد: حمدالله سلامتك .. ايه اللى حصل .. طمنا
سعيد: بسم الله ما شاء الله .. راجع من الخطف وشه منور ..وزى مايكون صغر عشرين سنة
دراكولا: سلمكم الله ..كانت أوقاتا عصيبة
مسعد: طيب أقعد ارتاح ..هاتى له حاجة يبل ريقه يا شربات
دراكولا: لاداعى ..فأنا فى أحسن حالاتى..والحمدلله
سعيد: طب ما تحكى لنا ياعمنا ..ايه اللى حصل ..ومين خطفك ..ورجعت ازاى
شربات: يوه يا سعيد..ماتستنى على الراجل ياخد نفسه
دراكولا: سأروى لكم كل ماحدث
مسعد: احكى لنا وطمنا
دراكولا: بعد ان انتهيت من مقابلة صاحب المركز..واتفقنا على أن ابدأ الدروس قريبا ..أحببت أن أمشى قليلا
على شاطىء النيل .. وهو ماحدث بالفعل
مسعد: ايوة..مانت قلت لى حاشم هوا واحصلك
دراكولا: بالفعل .. قادتنى قدماى الى منطقة بعيدة .. كان يلفها الظلام …وفجأة ..وجدت ثلاثة من الرجال يحملون
سيوفا ..واشياء لاأعرف لها أسما .. هاجمونى..ثم قيدونى بالحبال ..ووضعونى فى واحد من تلك العربات الصغيرة
التى تشبه الخنافس..وانطلقوا بى الى الصحراء
شربات: ياعينى ياخويا ..وبعدين
دراكولا: ثم القوا بى فى أحد الكهوف المهجورة.. قالوا لى أنهم سيرسلون رسالة لكم يطلبون فدية ماية ليطلقوا سراحى
سعيد: حصل ياعمنا
دراكولا: وفى حقيقة الأمر .. احسست بغضب شديد..وتصاعدت الدماء الى رأسى ..فقررت أن أنهى المسألة
مسعد: أوعى…!؟
دراكولا: نعم ..هذا ماحدث..وانهيت المسألة فى دقائق معدودات
سعيد: وانا أقول وشه نور ورجع شباب ازاى
شربات: والنبى مانا فاهمة
مسعد: مش مهم تفهمى ..المهم أنه رجع لنا بالسلامة
شربات: ايوةة ياخويا ..والنبى دا لازم اعمل ندر لأهل الله على سلامته
سعيد: أنا باقول ماتعملى لنا لقمة ..الراجل زمانه واقع من الجوع
شربات: من عنيا الاتنين.. نص ساعة ..وكله يبقى تماك
(خطوات منصرفة)
مسعد: هو صحيح ..انت خلصت الموضوع ..زى ما فهمنا
دراكولا: نعم .. قلت لك أن الغضب عندما يتملكنى لا أستطيع أن اوقفه
سعيد: طب وبعدين؟
دراكولا: اقول لكم الصدق .. بعد أن انتهيت منهم…وهدأت مشاعرى ..راودنى الأحساس ,,بأننى لم أعد استسيغ
الطعم ..وأظن اننى لن أفعلها مرة أخرى
سعيد: يعنى خلاص ..مافيش…..
دراكولا: نعم…يبدو أنى قد تغيرت
مسعد: أهم حاجة..حمد الله على سلامتك
دراكولا: سلمكم الله
سعيد: دول كانوا عايزين مليون يا عمنا
دراكولا: اكثير على هذا؟
سعيد: لأ..دا كتير علينا أحنا
( ينخرطون فى الضحك )
(قطع )
سعيد: الحمد لله .. النهاردة بس اقدر اقولك..أن كل اللى طلبه الواد البرنس بقى جاهز
دراكولا: ماذا تقصد؟
مسعد: عايز يقولك أن الفلوس اللى دبرناها ..من شغلك فى السنتر .. على شغلنا ..وكمان فلوس شربات ..نقدر
ندفع للواد سيد البرنس تمن الباسبور اللى طالبه
دراكولا: لاأدرى كيف اشكركم جميعا ..مافعلتموه من أجلى شىء …شىء عظيم
سعيد: عيب ياراجل ز.دا أحنا أهل ..مش اكلنا عيش وملح سوا..خلاص
دراكولا: لم أجد فى مثل كرمكم ..ولا شهامتكم أحد من قبل
مسعد: العفو يا عمنا .. الناس لبعضيها
دراكولا: لذلك ..أرجو أن تقبلوا طلبى هذا
مسعد: انت تؤمر ..غالى وطلبك رخيص
دراكولا: اصدقكم القول ..لاأريد هذا الباسبور كما تطلقون عليه
سعيد: أمال عايز أيه؟
دراكولا: أريد أن تسمحوا لى أن ابقى معكم هنا..إن لم يكن لديكم ما يمنع
سعيد: يعنى ..مش عايز ترجع لقصرك..وفلوسك..وكدة
دراكولا: اعتقد أن لا أحد هناك سيعرفنى ..ويكفى ما عشته هنا معكم ..من اخلاص وصدق ..وحب
سعيد: ايوة ..حب … مش باقولك شكلك طبيت
دراكولا( مضطربا ): اقصد .. انكم جعلتمونى أشعر بأنكم أهل لى ..وبيننا صلة دم قوية
مسعد: بلاش والنبى سيرة الدم الله يخليك
دراكولا: ( يضحك): لاأقصد ذلك…اقصد اشعر بالألفة والأمان بقربكم كما لوكنتم أقاربى
سعيد: دا عيش وملح ياجدع
مسعد: طبعا ياعمنا ..اهلا وسهلا بيك ..انت تشرفنا وتأنسنا
سعيد: طيب والموضوع التانى ؟
دراكولا: أى موضوع ؟
سعيد: شربات
( طرقات على الباب … يفتح الباب )
مسعد: جبنا سيرة القط… جاه ينط
شربات: قط أيه ياجدع انت ..ماتحسن ملافظك
دراكولا: اهلا ياست شربات
شربات: ياحلاوة ياولاد..أخيرا نطق بالعربى
سعيد: الله ..الله ..الراجل لسانه اتفك
شربات: والنبى كلامه زى السكر ..انا قلت اعمل لكم لقمة تتغدوا
دراكولا: من يد مانعدمها
مسعد: الله أكبر..ودى كمان
دراكولا: من عاشر القوم …اكيد اتعلمت منكم
شربات: يالا بالهنا والشفا..مدوا أيديكم
دراكولا: قبل ماناكل ..ممكن أطلب طلب
شربات: اتفضل ياخويا…من عينى ..نفسك فى أيه ..وأنا أعملهولك
دراكولا:…نفسى … نفسى …تبقى مدام دراكولا
شربات(تزغرد )
دراكولا: يعنى موافقة
شربات: يوه بقى ماتكسفنيش
سعيد: السكوت علامة الرضا ..الف مبرو
مسعد: دا احلى حاجة حصلت والله
سعيد: طب حيث كدة.. طيارة حاروح اجيب المأذون
دراكولا: بس على شرط… يجيب معاه الدفتر
( يضحكون )
النهاية
