النائبة ألفت المزلاولي: بعد حادثة الأقصر المروعة الإدمان يقتل.. والسكوت كارثة
قالت الدكتورة ألفت المزلاولي عضو مجلس النواب، عن واقعة جريمة الأقصر، إن مشهد مفزع ومرعب هز قلوبنا جميعًا، فيديو انتشر من الأقصر عن شاب مدمن مخدر “الشابو” يرتكب جريمة بشعة بقتل وفصل رأس إنسان غلبان وسط الشارع! هل دا اللي مستنيينه؟ هل هنسكت لحد ما نشوف بلاوي أكتر؟ الإدمان مش بس بيضيع اللي بيتعاطاه، دا بيحوله لوحش ممكن يأذي أهله وجيرانه ومجتمعه.
وأضافت النائبة، أنه بفضل الله، كنت الوسيط الوحيد بين صندوق مكافحة وعلاج الإدمان وجامعة سوهاج لإنشاء “مركز العزيمة” لعلاج الإدمان بمدينة سوهاج الجديدة، المركز تم تجهيزه وافتتاحه وشغال بكامل طاقته، والعلاج فيه مجاني وسري تمامًا، بقول لكل أب وأم، ولكل شاب أو بنت، الحقوا أنفسكم وأولادكم قبل ما تندموا يوم ما ينفعش فيه ندم.
لازم نتحرك فورًا، مجتمعنا محتاج كل فرد فيه، ومش هنسكت لحد ما نطهر شوارعنا وقرانا من هذا السم، مفيش مبرر للتأجيل.. العلاج متاح، والحل بإيدينا، ما تخلوش حد يضيع بسبب غفلتكم، وما تخلوش الكارثة تتكرر.
وهنا لازم نعترف إن الحل مش بس في مراكز العلاج، مع إن أهميتها كبيرة، كما أن الرقابة الأمنية والمطاردات البوليسية وحدها مش كفاية، ولا حتى الندوات والوعظ الديني لوحدهم هيحلوا المشكلة! ولو هبيحلوها مكناش شفنا أحداث يومية مروعة أبطالها من المدمنين القتلة.
الموضوع محتاج أكتر من دور الدولة، محتاج صحوة مجتمع كامل، الجوامع والكنائس، الأهل، الإعلام، المدارس، الكل لازم يتحرك بسرعة، الرقابة الأمنية وتعقب تجار السموم مهمة، لكن الحل الحقيقي هو منع وصول المخدرات لأولادنا من الأصل،
وحسب اقتراح احد المتابعين نعمل شهادة بعدم التعاطي للمخدرات تتطلب في كل مصلحة حكومية، نعمل تحليل للمخدرات في كل وقت بمناسبة وغير مناسبة، نتبني كمان الحلول العلمية النوعية الموجودة في أبحاث ومؤتمرات، ويتطلب تنفيذها جدية وإرادة حقيقية، مش بس من الحكومة، لكن كمان مننا كمجتمع وأفراد.
بناشد كل أب وأم، لو حسيت إن ابنك أو بنتك في طريق الإدمان، ما تستناش.. تحرك فوراً، “مركز العزيمة” موجود، العلاج ممكن، والفرصة لسه قدامهم، الإدمان مش بس بيدمر الشخص المدمن، لكنه بيهدد حياة كل اللي حواليه.
مخدر زي الشابو كبقية أنواع المخدرات بيحول البشر لوحوش.. شوارعنا وقرانا بقت مليانة مخاطر، اتحركوا قبل ما المصايب تزيد، حافظوا على ولادكم، لأن مفيش أغلى منهم!
امنعوا المخدرات توصل لاولادكم وحبابيكم وشاركوا في الإنقاذ وشدوا حالات الطوارئ وساعدوا المدمن يتعالج .. المدمن مش مجرم، المدمن مريض.
